|
06 Nov
2007 Muqdisho - Kooxo Hubeysan ayaa xalay
weerar ku qaaday Guriga Maareeyaha Dekeda
Muqdisho Cabdi Jiinow, iyadoona weerarkaas
uu ahaa mid sababay dhimasho iyo dhaawac.
Inta la og yahay ilaa labo ruux ayaa ku
dhimatay dagaal la isku adeegsaday hubka
noocyadiisa kala duwan oo xalay ka dhacay
Xaafadda Yaaqshiid guriga Maareeyaha Dekedda
Muqdisho.
Ilaalada Guriga Maareeyaha Dekedda Muqdisho
ayaa iska caabiyay weerarkaas mudada saacad
iyo bar socday oo ay guriga ku soo qaadeen
kooxo dad badan aaminsan yihiin in ay ka mid
yihiin kooxaha Kacdoonka ka wada Magaalada
Caasimadda ah ee Muqdisho.
Dagaalkan ayaa inta badan waxaa uu ka dhacay
Guriga Maareeyaha Dekedda Muqdisho Cabdi
Jiinow iyo Guri kale ee uu degan yahay
Ganacsade caan ah oo heyb qabiil wadaagan
Guddoomiyaha Gobolka Banaadir ahna duqa
Magaalada Muqdisho, ganacsadahaas oo lagu
magacabo Cali Beere Caddow.
In kastoo dagaalka xalay xilli isu socodka
dadka aad u yaraa dhacay ayaa haddana warar
laga helayo Ceel tuba weyne oo ah deegaanka
ay dagan yihiin labadaas Mas'uul waxaa ay
sheegayan in ay jiraan dad rayid ah oo
xaafadahooda ugu tagtay rasaasta labada
dhinaca is dhaafsanayeen.
Toddobaadyadii aynu soo dhaafnay ayaa waxaa
aad u soo kordhay weerarada kooxaha
Kacdoonka wada ku qaadayaan xarumaha
Dowladda, Mas'uuliyiinta Dowladda iyo
Ciidamada Ethiopia ee jooga Soomaaliya. |
Print
Email
