|
 03/11/2008
- Xubno ka tirsan Odayaasha Dhaqanka
Beelaha Hawiye, isla markaana uu hogaaminayo
Afhayeenka Odayaashaas Axmed Diiriye Cali
ayaa gaaray Magaalada Jowhar, halkaasoo la
filayo inay kula kulmaan Gudoomiyaha
Isbaheysiga Dib u Xoreynta Sheekh Shariif.
Xubnaha Axmed Diiriye horkacaya oo maanta ka
tagay Magaalada Jowhar ayaa la sheegayaa in
gelinkii dambe ee maanta ay gaareen, waxaana
Odayaasha Hawiye u muuqdaan kuwo isku
khilaafsan la kulanka Sheekh Shariif.
Warar soo baxaya ayaa sheegaya in qaar ka
mid ah Odayaasha Hawiye ay ka soo
horjeesteen imaanshaha Sheekh Shariif,
iyagoona markii hore qaadacay heshiiskii
jabuuti.
Axmed Diiriye iyo Odayaasha uu hogaaminayo
ayaa sida wararku sheegayaan maalinta berri
la balansan Shariifka, oo maalmahan
magaalada Jowhar ka waday, la kulanka
Odayaasha dhaqameedyada, waxgaradka iyo
culumaa'udiinka.
Magaalada Jowhar ayaa xilligan ah mid aad u
mashquul ah, iyadoona ay ku qul qulayaan
dadweyne fara badan oo ka kala socda qeybaha
kala duwan ee Bulshada.
La taliyaha Gudoomiyaha Odayaasha Dhaqanka
Beelaha Hawiye oo lagu magacaabo Salaad
Barwaaqo ayaa ku tilmaamay Xubnaha uu
horkacayo Axmed Diiriye kuwo is xilqaamay oo
aanay ka socon Odayaasha Hawiye, waxaana uu
tagitaankooda Magaalada Jowhar ku macneeyay
dhuumasho, isagoona qeexay in aanay jirin
cid ay wakiilatay Odayaasha Dhaqanka Beelaha
Hawiye oo la kulameysa Sheekh Shariif iyo
wafdigiisa. |
Print
Email
