|
 02/11/2008
- Labaatameeyo Tahriibayaal Soomaali ah
ayaa ku qaraqantay Xeebta Gobalka Abyan ee
dalka Yeman, 75-kalena wey ka badbaadeen,
kadib, markii ay doonidii la socdeen ku
degtay Xeebaha duufaano dhacayey awgeed.
Hadal ka soo baxay Mas'uuliyiinta Maamulka
Gobalka Abyan ee dalka Yeman, ayaa waxay
sheegayaan inay 23-Barakacayaal Soomaali ah
geeriyoodeen,, halka 75-kale oo ay 15 ka mid
haween ahaayeen ka badbaadeen doonidii ay la
socdeen oo ay dabaylo xooggan ku kaceen,
xilli ay ku soo dhow yihiin Xeebaha Gobalka
Abyan.
Mas'uul u hadlay Website-ka Al-mu'tamar.net
ee ka soo baxa dalka Yeman, ayaa sheegay in
duufaan xoog badan iyo mowjadaha badda oo
sare u kacay ay sababtay inay qalibantay
doonidii ay la socdeen 98-Tahriibayaal
Soomaali ahaa, waxaana masiibadaasi ku
maashowday 23-qof oo ay ku jireen carruur
iyo haween.
Kalluumeysato Yemaniyiin ah oo ku sugnaa
Xeebta Hoomat ee Gobalka Abyan ayaa u
gurmaday doonida ku rogantay badda, waxayna
soo badbaadiyeen 75 ka mid ah dadkii ka
samatabaxay doonidaasi qalibantay.
Waraka waxay sheegayaan in Tahriibayaasha la
badbaadiyey ay gacan ka heleen Hay'adda
Dhakhaatiirta aan xuduudka lahayn "MSF" oo u
keentay Gaadiidka Gurmadka Caafimaadka ee
Ambalaasta, waxaana Tahriibayaasha loo
gudbiyey Xerooyinka lagu hayo dadka
Qaxootiga Tahriibayaasha ah.
Ma aha markii ugu horreysay oo dad
Tahriibayaal ay ku naf waayaan
Tahriib-badeedka ay ugu soo kicitamayaan
Xeebaha dalka Yeman, iyadoo ku dhawaad
100-Tahriibayaal Soomaali ah ay ku naf
waayeen Xeebta Gacanka Cadmeed ee dalka
Yeman bishii Okt. Ee la soo dhaafay, kadib,
markii ay Badmaaxiinta waday Tahriibayaasha
ay si khasab ah ugu daadiyeen Doonyihii ay
la socdeen.
Tahriibayaasha Soomaalida ee sannaadkan oo
keliya ku geeriyootay safar-baddeedka
sharci-darradda ee ay ku soo tiigsanayaan
Xeebaha dalka Yeman, waxay gaarayaan ilaa
365-qof, sida ay shaacisay Hay'adda QM ugu
qaabilsan Arrimaha Qaxootiga "UNHCR". |
Print
Email
